बुलढाणा जिल्ह्यासह राज्यातील प्राविण्यप्राप्त खेळाडूंना यंदा दहावी व बारावी परीक्षेसाठी ग्रेस गुण अर्ज फक्त आणि फक्त ऑनलाईन पद्धतीने सादर करावा लागणार आहे. क्रीडा आयुक्तांनी याबाबत आदेश जारी केले असून, सर्व अर्ज शासनाच्या आपले सरकार पोर्टलद्वारेच स्वीकारले जातील.
यापूर्वी खेळाडू विद्यार्थ्यांचे सवलत गुण अर्ज जिल्हा क्रीडा कार्यालयाच्या माध्यमातून ऑफलाईन पद्धतीने पाठवले जात होते. मात्र, अर्ज प्रक्रियेत होणाऱ्या त्रुटी आणि तक्रारी लक्षात घेऊन या शैक्षणिक सत्रापासून (२०२४-२५) पूर्णपणे ऑनलाईन प्रक्रिया अनिवार्य करण्यात आली आहे.
जिल्हा क्रीडा अधिकारी बी. एस. महानकर यांनी स्पष्ट केले आहे की, यापुढे कोणताही अर्ज ऑफलाईन पद्धतीने स्वीकारला जाणार नाही. सर्व माध्यमिक शाळा, कनिष्ठ महाविद्यालये आणि खेळाडूंनी आपल्या अर्जासाठी आपले सरकार पोर्टलचा वापर करणे बंधनकारक असेल.
ऑनलाईन प्रक्रियेचा मुख्य उद्देश म्हणजे मानवी त्रुटींमुळे होणारे नुकसान टाळणे व खेळाडूंना वेळेत सवलत गुण मिळवून देणे. यामुळे विद्यार्थ्यांचे शैक्षणिक व नोकरीसंबंधित नुकसान टळेल, अशी अपेक्षा आहे.
महत्त्वाचे मुद्दे:
अर्ज केवळ आपले सरकार पोर्टलद्वारेच स्वीकारले जातील.
ऑफलाईन अर्ज स्वीकारले जाणार नाहीत.
ऑनलाईन प्रक्रियेमुळे अर्जातील त्रुटी कमी होतील.
सवलत गुणांसाठीचे अर्ज भरण्याची अंतिम मुदत लवकरच जाहीर होईल.
राज्यातील सर्व खेळाडूंनी या प्रक्रियेत सहभागी होऊन लाभ घ्यावा, असे आवाहन क्रीडा आयुक्त कार्यालयाकडून करण्यात आले आहे.
https://chat.whatsapp.com/FQ1Ted6AXpIHcQxdUSP2sr