बुलढाणा (प्रतिनिधी): शहरातील म्हाडा कॉलनीत घडलेल्या चोरीच्या घटनेने परिसरात खळबळ उडाली आहे. संदीप वानखेडे यांचे घर चोरट्यांनी फोडले असून, रोख रक्कम व दागिने लंपास केले आहेत.
वानखेडे कुटुंब मागील आठवड्यापासून मूळ गावी आंबेटाकली येथे गेले होते. घर बंद असल्याची संधी साधून चोरट्यांनी रात्रीच्या वेळी घराचे कुलूप तोडून आत प्रवेश केला. कपाट उघडून त्यातील ३५ हजार रुपये रोख रक्कम, तसेच सोन्याचे मंगळसूत्र व पेंडाल चोरीला गेले.
ही घटना सकाळी उघडकीस आली, त्यानंतर वानखेडे यांनी पोलिसांना कळवले. पोलिसांनी घटनास्थळी भेट देऊन तपास सुरू केला आहे. सदर घटनेने परिसरात भीतीचे वातावरण निर्माण झाले असून, नागरिकांनी सुरक्षेबाबत सतर्क राहण्याचे आवाहन पोलिसांनी केले आहे.
पुढील तपास सुरू
पोलिस चोरीसंबंधी अधिक तपास करत असून, चोरट्यांचा शोध घेण्यासाठी परिसरातील सीसीटीव्ही फुटेजची पाहणी सुरू आहे.
